اولدوز سایاراق گوزلمیشم هر گیجه یاری
گج گلمه ده دیر یار،یینه اولموش گیجه، یاری
گوزلر آسیلی، یوخ نه قارالتی، نه ده بیر سس
باتمیش گولاغیم ،گورنه دوشورمکده دی داری
بیر گوش «آییغام!»سویلیه رک،گاهدان اییلده ر
گاهدان اونوداییل دییه لای لای هوش آپاری
یاتمیش هامی،بیر اللاه اویاقدیر،داها بیر من
مندن آشاغی کیمسه یوخ، اوندان دایوخاری
قورخوم بودی یار گلمه یه، بیر دن یاریلا صبح
باغریم یاریلار،صبحوم آچیلما،سنی تاری!
دان اولدوزی ایسته رچیخا ریا،گوز یالواری چیخما
او چیخماسا دا اولدوزومون یوخدی چیخاری
گلمز،تانیرام بختیمی،ایندی آغارارصبح
قاش بیله آغاردیقجا،داها باش دا آغاری
عشقین کی قراریندا وفا اولمیاجاقمیش
بیلمم کی طبیعت نیه قویموش بو قراری؟
سانکی خوروزون سون بانی،خنجردی سوخولدی
سینه مده اورک وارسا،کسیب قیردی داماری
ریشخندله قیرجاندی سحر،سویله دی:دورما
جان قورخوسی وار،هرکیم اوتوزموش بو قماری
اولدوم قره گون،آیریلالی اوساری تلدن
بونجا قره گونلردی ایدن رنگیمی ساری
گوزیاشلاری هریردن آخارسا،منی توشلار
دریایه باخار،بللی دی،چایلارین آخاری
از بس منی یاپراق کیمی هجرانلاسارالدیب
باخسان اوزونه سانکی قیزیل گولدی ،قیزاری
محراب شفقده اوزومی سجده ده گوردوم
قان ایچره غمیم یوخ،اوزوم اولسون سنه ساری
عشقی واریدی«شهریار»ین گللی چیچکلی
افسوس،قارایل اسدی،خزان اولدی بهاری
